काठमाडौं, भदौ १८ गते ।
अमेरिकाले भोटेकोशी बाढीबाट प्रभावित दुर्गम क्षेत्रमा विद्युत् आपूर्ति सहज बनाउन सशस्त्र प्रहरीलाई तीन वटा सोलार चार्जिङ ट्रेलर सहयोग गरेको छ ।
अमेरिकी दूतावासका कार्यवाहक उपप्रमुख विल भनले ती सोलार चार्जिङ ट्रेलर औपचारिक रूपमा सशस्त्र प्रहरी बललाई हस्तान्तरण गरे ।
सशस्त्रले बाढी प्रभावित दुर्गम समुदायमा भरपर्दो विद्युत् उपलब्ध गराउन ती ट्रेलर परिचालन गर्नेछ। भोटेकोशी बाढीका कारण विद्युत् तथा अन्य आधारभूत सेवामा समस्या भएका क्षेत्रमा यसको प्रयोग हुने छ ।
सोलार चार्जिङ ट्रेलर अमेरिकी विदेश मन्त्रालयअन्तर्गतको ब्युरो अफ इन्टरनेसनल नार्कोटिक्स एन्ड ल इन्फोर्समेन्ट अफेयर्सले अमेरिकी न्याय विभागसँगको सहकार्यमा उपलब्ध गराएको अमेरिकी राजदूतावासले जनाएको छ ।
